Муроджон Аҳмадалиев Тошкентда янги дивизионда жангини ўтказди - бунинг сабаби маълум

Мусобақанинг асосий беллашувида ҳамюртимиз Муроджон Аҳмадалиев рингга кўтарилди.

Иккинчи энг енгил вазн тоифасидаги собиқ жаҳон чемпиони Муроджоннинг Венесуэла вакили Эгли Москеда билан жанги Аҳмадалиев шу кунга қадар фаолият юритиб келган иккинчи энг енгил вазн (55,2 кг) эмас, ярим енгил вазн тоифасида (57,1 кг) ташкил этилди. 10 раундлик баҳсда Муроджон рақибини тўртинчи раундда техник нокаут орқали енгди.

Ҳамюртимиз янги вазн тоифасидаги жангини қуйидагича изоҳлади:

"Мақсадларим ўзгармаган — жаҳон чемпионлик камарлари ва энг катта жанглар. 55 кг вазнда ўзимни қулай ҳис қиламан. Лекин муносиб имконият туғилса, 57 кг дивизионига кўтарилишга ҳам тайёрман. Вазиятга реал қарайман: агар Иноуэ иккинчи энг енгил вазнда қолса, кейинги имкониятгача яна икки йил ўтиб кетиши мумкин. Мен эса кутгим келмайди. Шунинг учун бошқа вазнда ҳам чемпионлик камарлари учун курашишга тайёрман. Агар Иноуэ юқори вазнга ўтиб, титулни вакант қолдирса, унда мен 55 кг вазнда ўша камар учун жанг қиламан", дейди юртдошимиз.

Маълумот учун, ярим енгил вазн тоифасида яна бир ҳамюртимиз — Отабек Холматов титул учун даъвогарлардан саналади.