Муроджон Аҳмадалиев “Йилнинг энг яхши ёш боксчиси” бўла олдими?

Аввал хабар берганимиздек, ҳамюртимиз Муроджон Аҳмадалиев ҳам даъвогарлар қаторига киритилган эди. Профессионал бокснинг енгил вазн тоифасида мағлубиятсиз одимлаётган Муроджон “Йилнинг энг яхши ёш боксчиси” номинациясида ғолиб бўлиш учун асосий даъвогар бўлиб турганди. 

Лекин якунда бу номга Муроджон Аҳмадалиев эмас, яна бир енгил вазн тоифасидаги кубалик боксчи Теофимо Лопес лойиқ кўрилди. Аҳмадалиев ва Лопесдан ташқари “Йилнинг энг яхши ёш боксчиси” бўлиш учун Жошуа Буатси, Жерон Эннис ва Филип Хргович ҳам даъвогарлик қилганди.

Маълумот учун, Аҳмадалиев енгил вазн (55,3 кг) тоифаси WBA йўналиши рейтингида биринчи ўринни эгаллаб турибди. У WBA чемпионлик камари соҳиби америкалик Даниэль Романнинг биринчи рақамли рақиби ҳисобланади. 

Эслатиб ўтамиз, боксчимиз 24 ноябрь куни америкалик Исаак Заратега қарши жанг ўтказиб, нокаут эвазига ғалаба қозонганди. У ўша жангида ўзининг WBA Intercontinental камарини ҳимоя қилганди.