"Муроджонда янада яхшироқ жанг қилиш имконияти бор эди" - Тўлқин Қиличев Аҳмадалиев - Иноуэ жанги ҳақида

Эслатиб ўтамиз, 14 сентябрь куни Нагояда ўтказилган жангда Аҳмадалиев 12 раундлик жангда очколар эвазига Иноуэга имкониятни бой берганди.

"Бу ерда кўп омиллар бор. Баъзи жиҳатларни фақат спортчилар ва мураббийларнинг ўзлари тушунишади. Муроджонда бундан яхшироқ жанг қилиш имконияти бор эди. Бор салоҳиятини намойиш эта олмади. 

Шунингдек, рақибнинг тезлигини ҳам алоҳида эътироф этмасак бўлмайди. Бундан ташқари, жангга бўлган рухий тайёргарлик, жанггача бўлган муносабат, муҳит шунга олиб келди. Буни барибир хеч кимга тушунтириб, исботлаб бера олмаймиз.

Бизнинг жангга бўлган умумий муносабатимиз бироз нотўғри бўлиб қолди. Буни бўйнимизга оламиз. Жанг муддатини, вақтни тўғри тақсимламаслик бизга ҳалал берди. 

Вақт ўтган сари, барибир Муроджон қандай боксчи эканлигини исботлайди. 

- Жанг вақтида сиз терма жамоамиз билан Ливерпулдаги Жаҳон чемпионатида эдингиз. Агар ЖЧ вақти бўлмаганида, сиз ҳам Японияга бориб, шогирдингиз ёнида бўлардингиз деб ўйлаймиз...

- Албатта. Ўзбекистон терма жамоаси - катта жамоа. Муроджон эса бир ўзи тушадиган профессионал жанг. Бунга қанчалик ҳаракат қилмай - мен Аҳмадалиевнинг жангига бора олмасдим. Бош мураббий сифатида Ўзбекистон терма жамоасини ташлаб кета олмасдим. 

Унинг ёнида бўла олмаганимдан албатта қийналдим, афсусландим. Шундай бўлиши керак экан. 

Муроджоннинг кучига менда умуман шубҳа йўқ. Вақти келади ва ўшанда бу гапларим тўғри эканлиги исботланади", - деди Қиличев olamsport.com сайти журналисти Азиз Тўхтамуродов билан суҳбатда.