МЮ англиялик юлдуз учун катта пул тўлашга тайёр

"TEAMtalk" маълумотларига кўра, "қизил иблислар" раҳбарияти "Ньюкасл" вингери Энтони Гордон учун тахминан 100 млн евро (87,4 млн фунт) тўлашга тайёр.

Хабар қилинишича, агар жамоа вақтинчалик мураббий Майкл Кэррик қўл остида Чемпионлар Лигасига чиқса, клуб эгаси ҳисобланган INEOS компанияси трансферларга 200 млн фунтдан ортиқ сармоя киритишни режалаштирмоқда.

Журналист Бен Жейкобснинг таъкидлашича, "Юнайтед"ни футболчининг универсаллиги ўзига тортмоқда — Энтони чап қанотда юқори тезликка эга бўлиш билан бирга, марказий ҳужумчи ролида ҳам чакки эмас.

Гордон ушбу мавсумда сермаҳсуллиги билан ажралиб турибди. "Ньюкасл" сафида у ҳозиргача 141 ўйинда 32 та гол уриб, 28 та голли пас берган.

МЮ инглиз футболчисидан ташқари "Лейпциг" юлдузи Ян Диомандени ҳам кузатмоқда, бироқ Премьер-лигадаги тажрибаси туфайли Гордон ҳозирча устувор мақсад бўлиб қолмоқда.