21 июн 11:31
Янгиликлар

Енгил атлетика

Надия Дусанова Польшадаги турнирда совриндор бўлди

Польшанинг Ополе шаҳрида енгил атлетиканинг баландликка сакраш тури бўйича анъанавий "Opole High Jump Festival" мусобақаси якунига етди.

Ушбу халқаро турнирда ўзбекистонлик спортчи Надия Дусанова ҳам иштирок этди ва совриндорлар қаторидан жой олди.

Қизғин кечган беллашувларда ғолиблик икки карра жаҳон чемпиони ҳисобланган россиялик Мария Ласицкенега насиб этди. У 194 см баландликка сакраб, олтин медаль соҳибасига айланди. Шоҳсупанинг иккинчи поғонасидан эса 190 см баландликни забт этган Надия Дусанова ўрин олди. Кучли учликка украиналик Юлия Чумаченко (186 см) якун ясади.

Қайд этиб ўтиш лозимки, Надия Дусанова Осиё ўйинларига тайёргарликни қизғин давом эттирмоқда. Ушбу турнир ҳам Жакартадаги нуфузли мусобақа учун ўзига хос тайёргарлик вазифасини бажарди. Умид қиламизки, Дусанова август ойида бўлиб ўтадиган Осиё ўйинларида делегациямиз ҳисобига олтин медални қўшиб қўя олади.