Надия Дусанова Словакиядаги турнирда иштирок этди

Мусобақада енгил атлетиканинг мазкур тури бўйича дунё етакчилари ҳисобланган спортчилар иштирок этди. Улар орасида амалдаги жаҳон чемпиони, кетма-кет 32та мусобақадан бери ғолибликни қўлга киритиб келаётган, ўз вақтида 206 см натижани қайд этган россиялик Мария Ласицкене ҳам қатнашди. Ундан ташқари Сент Люис вакиласи Спенчер Леверн, болгариялик Мирела Мемирева, италиялик Алессия Трост, Чехия вакили Михаэла Хрубаларни кўришимиз мумкин эди. Таъкидлаб ўтиш лозимки, юқорида санаб ўтилган спортчиларнинг шахсий рекорди камида 195 см ни ташкил қилади. 

Ушбу юлдузлар қатори турнирда Осиёнинг уч карра чемпиони, ҳамюртимиз Надия Дусанова ҳам иштирок этди. Баҳсларда Дусанова 184 см натижа кўрсата олди. 

Якунда мусобақада россиялик спортчи Мария Ласицкене ўзининг кетма-кет 33-ғалабасини тантана қилди. У 202 см баландликка сакрай олди. Ундан кейинги ўринларни эса Спенчер Леверн ҳамда Алессия Тростлар эгалладилар.

Надия Дусанова бугун Чехияда ўтказиладиган халқаро мусобақада иштирок этади. Ушбу турнирда ҳамюртимиздан муваффақиятли иштирокни кутиб қоламиз. 

Эслатиб ўтамиз, Дусанова бир ҳафта олдин Эронда ўтказилган ёпиқ иншоотлардаги Осиё чемпионатида 187 см баландликка сакраб, олтин медаль соҳибига айланганди.