Наманган “Фьючерс”. Шарипованинг илк рақибаси маълум

Бугун соврин жамғармаси 25 000 АҚШ долларини ташкил қилувчи ушбу мусобақада саралаш баҳслари якунланиб, асосий тўрга йўлланма олган барча теннисчиларнинг номи маълум бўлади. Кеча ташкилотчилар асосий тўрга қуръа ташлашди.

Унга кўра, турнирнинг биринчи ракеткаси сифатида қайд этилган ҳамюртимиз Сабина Шарипова илк даврада россиялик Анастасия Фроловага қарши кортга чиқади. Имтиёзли йўлланма асосида асосий тўрга қўйилган Арина Фолц яна бир рус теннисчиси, турнирнинг саккизинчи ракеткаси Анна Моргина билан тўқнаш келади. 

Валентина Шлейн болгариялик Юлия Терзиска, Сетора Нормуродова россиялик Дарья Кружковага қарши кортга чиқади. Турнирда тўртинчи рақам остида таснифланган Нигина Абдураимованинг рақибаси саралаш турнири ғолибаларидан бири бўлади.