Наоя Иноуэ иштирокидаги жанг муддатидан олдин тўхтатилди

Оқшомнинг асосий жангида иккинчи ўта енгил вазн тоифасида мутлақ жаҳон чемпиони Наоя Иноуэ америкалик Рамон Карденасга қарши рингга кўтарилди. Ўн икки раундга мўлжалланган жанг саккизинчи раундда рефери томонидан тўхтатилди. Япониялик боксчи рақибини техник нокаутга учратиб, ўз чемпионлик камарларини яна бир бор муваффақиятли ҳимоя қилди. 

Эътиборга молик жиҳати шундаки, Иноуэнинг ўзи ҳам иккинчи раундда ўтказиб юборган зарбаси сабаб нокдаун ҳолатига тушиб қолди. Аммо ўрнидан туриб, жангни давом эттира олди. Рамон эса ўша вазиятда муваффақиятини ривожлантира олмади. Наоянинг ғалабалари роппа-роса 30 тага етди. Унинг ҳисобида дуранг ҳам, мағлубият ҳам йўқ. У энди сентябрь ойида ҳамюртимиз Муроджон Аҳмадалиевга қарши жанг ўтказади. Карденас эса бугун фаолиятидаги иккинчи мағлубиятини қабул қилиб олди. Ғалабалари 26 талигича қолди.