Нганну UFC`га қайтиши мумкинлиги ҳақида хабар бўйича Дана Уайтга жавоб берди

Вақтинчалик камар соҳиби бўлиб турган британиялик Том Аспиналл Жонснинг кетиши фонида оғир вазн тоифасида тўлақонли UFC чемпионига айланди. UFC раҳбари Дана Уайт ҳам Фрэнсис Нганнунинг қайтиши мумкинлигига ўз муносабатини билдирди.

"Мен Фрэнсиснинг катта мухлиси эмасман. Бир нарсани англаб етдимки, унинг айтадиган гаплари деярли ҳақиқатга тўғри келмайди. Яъни, айтган гапларини амалда исботлайвермайди. Шундан келиб чиқиб айтишим мумкинки, агар Нганну UFC`га қайтса, бундан ҳайрон қоламан", - деди Уайт.

Камерунлик оғир вазнли аралаш яккакураш устаси UFC президентининг бу гапини жавобсиз қолдирмади.

"Мен UFC`га қайтишим ҳақида гапирмаган эдим шекилли?", - дея ўзининг ижтимоий тармоқдаги саҳифасида хабар қолдирган Нганну. 

Шунингдек, Фрэнсис мухлислардан бирининг "Йўқотган камарингни қайтариб олиш учун ҳам қайтмайсанми?" дея ёзган гапига ҳам жавоб бериб кетди. 

"Ниманидир йўқотганимни эслай олмаяпман, оғайни. Сен айтган нарса менинг шкаф жовонимда турибди", - дея мухлисга жавоб берди камерунлик.