Нодирбек Абдусатторов Sinquefield Cup турниридаги иштирокини бошлади

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этади. Ғолиб шахматчи 100 000 долларга эга чиқади. Мусобақада дунёнинг 10 нафар кучли гроссмейстерлари бош соврин учун баҳсларга киришди. Улар орасида жаҳон чемпиони Нодирбек Абдусатторов (2762) ҳам бор. 

Турнирнинг 1-турида ҳамюртимиз қора доналарда Рамешбабу Прагнанандҳа (Ҳиндистон, 2749) билан дурангга имзо чекди. Биринчи турда биргина ғалаба қайд этилди. Франциялик Алиреза Фирузжа қора доналарда ҳаракат қилганига қарамай, турнирнинг биринчи рақамли иштирокчиси, америкалик Фабиано Каруанани мағлуб этишни уддалади. Қолган барча партияларда гроссмейстерлар муроса кўчасини танлашди. 

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов  (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).