25 авг 08:34
Янгиликлар

Шахмат

Нодирбек Якуббоев 61th Rubinstein Memorial чемпиони!

Теглар : Нодирбек Якуббоев 61th Rubinstein Memorial

Польшанинг Поляница-Здруй шаҳрида шахмат бўйича анъанавий “Akiba Rubinstein International Chess Festival” турнири ўз якунига етди.

Ўз тарихида 61-маротаба ташкил этилган ушбу мусобақа 7 та гуруҳда ўтказилиб, кучлилар жам бўлган “ALREH” гуруҳида ҳамюртимиз, халқаро гроссмейстер Нодирбек Якуббоев бош соврин соҳибига айланди. Ушбу гуруҳдан 10 нафар гроссмейстер ўрин олган бўлиб, ғолиб 9 тур натижасига кўра аниқланди.

“ALREH” гуруҳи иштирокчилари: Аравиндҳ Читҳамбарам (Ҳиндистон) – 2723, Игорь Коваленко (Украина) – 2676, Майкл Адамс (Англия) – 2663, Нодирбек Якуббоев (Ўзбекистон) – 2663, Маттиас Блуебаум (Германия) – 2660, Давид Навара (Чехия) – 2650, Радослав Войташек (Польша) – 2648, Матеуш Бартел (Польша) – 2576, Павел Тецлаф (Польша) – 2571, Ян Климковски (Польша) – 2517

Сўнгги 9-турда Нодирбек Якуббоев ўзи учун керакли натижа қайд эта олди. У украиналик гроссмейстер Игорь Коваленко билан дурангга имзо чекди. Мусобақа якунланишига бир тур қолган бир пайтда Нодирбек энг яқин таъқибчиси германиялик гроссмейстер Маттиас Блубаумдан бир очкога ўзиб кетганди. Саккизинчи турда Якуббоев айнан Маттиас билан дуранг ўйнаган эди.

Шу тариқа, Нодирбек Якуббоев 9 имкониятдан 6,5 очко жамғариб, Rubinstein Memorial 2025 чемпионлигини қўлга киритди. Гроссмейстеримиз ўз ҳисобига +18.2 очко қўшиб қўйиши натижасида LIVE рейтинг жадвалида 15 поғонага юқорилаб, 45-ўриндан жой эгаллади.