"Номзодлар турнири". Синдаров кетма-кет учинчи марта турнинг энг яхши шахматчиси!

Хабар берганимиздек, кеча мусобақанинг 5-турида амалдаги Жаҳон Кубоги ғолиби Жавоҳир Синдаров мусобақадаги тўртинчи, қаторасига учинчи ғалабасини тантана қилди. Ҳамюртимиз қора доналарда ўйнаганига қарамай, рейтингда ўзидан юқорида бораётган америкалик Ҳикару Накамурани мағлубиятга учратди. 

Эътиборлиси, Жавоҳир Синдаров ташкилотчилар томонидан қаторасига учинчи бор турнинг энг яхши шахматчиси деб топилди. У учинчи ва тўртинчи турларда ҳам энг яхши бўлганди.  

Дунёнинг амалдаги учинчи рақамли шахматчиси, 4-турда Жавоҳирга ютқазган америкалик Фабиано Каруана 5-турда оқ доналарда германиялик Маттиас Блубаумни таслим этди ва Синдаров билан ўртадаги 1 очколик тафовутни сақлаб қолди. 

Кечаги ғалабадан сўнг Жавоҳир 5 имкониятдан 4,5 очко тўплаб, турнир жадвалида якка пешқадамлигини давом эттирмоқда. Каруана 3,5 очко билан 2-ўринни сақлаб қолди. Кеча 5-турдаги қолган икки партияда кучлар тенг келди. Нидерландиялик Аниш Гири хитойлик Вей Йи билан, ҳиндистонлик Рамешбабу Праггнанандҳа россиялик Андрей Есипенко билан дуранг ўйнади.  

Бугун 6-турда Жавоҳир Синдаров қора доналарда хитойлик гроссмейстер Вей Йига қарши баҳс олиб боради. Фабиано Каруана оқ доналарда Андрей Есипенко билан ҳисоб-китоб қилади. Ҳикару Накамура Рамешбабу Праггнанадҳа билан тўқнаш келади. 

Маълумот учун, Синдаров Жаҳон тожи учун ўйнаш имкониятини берадиган турнирда иштирок этаётган биринчи ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суради.