Нурсултон Рўзибоев октагонга чиқадиган турнирининг марказий жанги эълон қилинди

Ташкилотчилар UFC on ESPN 54 оқшомининг марказий жангини эълон қилишди. Аёллар ўртасида энг енгил вазн тоифасидаги ушбу жанг даъвогарлик мақомида бўлиб, унда Эрин Блэнчфилд ва Манон Фиоро ўзаро октагонда тўқнаш келишади. Аслида турнирнинг асосий жанги яримўрта вазнда Шон Брэди ва Висенте Луке ўртасида ўтказилиши керак эди. 

Маълумот учун, Эрин ҳам, Манон ҳам мағлубият нималигини билмай келяпти. Уларнинг ҳар иккиси ҳам кетма-кет 6 та жангда ғалаба қозонишган. Блэнчфилд сўнгги жангида Таила Сантосни, Фиоро эса собиқ UFC чемпиони Роуз Намаюнасни очколар ҳисобига кўра мағлубиятга учратди.

Айни пайтда Эрин Блэнчфилд UFC рейтингида иккинчи, Манон Фиоро эса учинчи ўринни эгаллаб турибди. Ушбу вазнда мексикалик Алекса Грассо чемпионлик камари соҳиби бўлса, собиқ чемпион Валентина Шевченко рейтингда биринчи ўринни банд этган.

Дарвоқе, Нурсултон Рўзибоев айнан 30 март куни бўлиб ўтадиган UFC on ESPN 54 турнирида Седрик Дюмага қарши октагонга чиқади.