Нурсултон Рўзибоевнинг кейинги рақиби ким экани аниқ, бу Бо Никал эмас — инсайдер

31 яшар ҳамюртимиз 16 август куни АҚШнинг Чикаго шаҳрида ташкил эталадиган UFC 319 турнири доирасида октагонга кўтарилади.

Нурсултон Рўзибоевга турнир доирасида польшалик Михал Олексейчук рақиблик қилади.

Бу ҳақда Кайл Докас маълум қилди. Ҳар икки жангчи ўз саҳифалари орқали Чикагода жанг қилишини тасдиқлашган.

UFC 319 турнирининг марказий беллашуви ўрта вазн чемпиони Дрикюс Дю Плесси ва Хамзат Чимаев ўртасида кечади. Рўзибоев — Олексейчук баҳси ҳам айнан ўрта вазн тоифасида ташкил этилади.

Андижонда туғилган Рўзибоев фаолияти давомида 47 та жанг ўтказиб, 36 та ғалаба, 9 та мағлубият ва 2 та дуранг қайд этган. 30 ёшли Олексейчук ҳисобида эса 20 та ғалаба ва 9 та мағлубият бор.

Аввалроқ, Нурсултон сўнгги жангидаги ғалабасидан кейин Бо Никал билан беллашиш истагини билдирганди.