Oeiras Ladies Open. Кудерметова бош совринга яқинлашмоқда

Мусобақанинг саралаш баҳсларидаги икки ғалабаси эвазига асосий тўрга йўлланма олган мамлакатимизнинг иккинчи ракеткаси Полина Кудерметова 1/2 финалга етиб келди. Вакиламиз 1/16 финалда швейцариялик Селин Наефни 5/7, 6/0, 6/2, 1/8 финалда испаниялик Гуйомар Маристанини 5/7, 6/4, 6/4 ҳисобида таслим этган эди. 

Дунёнинг 137-ракеткаси бўлиб турган вакиламиз 1/4 финалда WTA рейтингида 166-ўринни банд этган италиялик Лючия Бронцеттига қарши кортга чиқди. Тўқсон етти дақиқа давом этган баҳсда Полина 7/6(4), 6/4 ҳисобида зафар қучди. Бу теннисчиларнинг ўзаро ўтказган илк учрашуви бўлди. Кудерметова 1, Бронзетти 2 та эйс зарбани амалга оширди. Қўшхатолар Полинада каррасига кўпроқ бўлди - 6 га 1. 

Бугун Полина Кудерметова финал чиптаси учун америкалик Уитни Осигвега қарши кортга чиқади. Уитни WTA рейтингида 180-поғонада бормоқда. Ушбу баҳс бизнинг вақт билан соат 15:00да бошланади.