Oeiras Ladies Open. Полина Кудерметова финалда уч сетлик учрашув ўтказди

WTA 125 тоифасига кирувчи мусобақанинг саралаш баҳсларидаги икки ғалабаси эвазига асосий тўрга йўлланма олган мамлакатимизнинг иккинчи ракеткаси Полина Кудерметова финалгача етиб келди. У бироз аввал якунига етган ҳал қилувчи финал учрашувида франциялик Фиона Феррога қарши кортга чиқди. 

Таққослаш учун, Кудерметова дунё рейтингида 137, Ферро эса 246-ўринни банд этганди. Бир соату 48 дақиқа давом этган уч сетлик баҳсда афсуски, Фионанинг қўли баланд келди - 6/3, 0/6, 6/1. Бу теннисчиларнинг ўзаро ўтказган учинчи учрашуви бўлди. Бугунгача мувозанат тенг эди. Бугунги муҳим ғалаба орқали у ҳисобда олдинга ҳам чиқиб олди - 2:1. 

Маълумот учун, 29 ёшли Ферро сўнгги бор 2020 йилда Палермо шаҳридаги WTA 250 тоифасига кирувчи турнирда чемпион бўлганди. Орадан 6 йил ўтиб франциялик теннисчи яна совринга эга чиқди. У бир ҳафталик меҳнатида 125 рейтинг очкоси ҳамда 13 480 евро мукофот пулига эга чиқди. Вице-чемпион Кудерметова эса 81 очко ҳамда 7 304 еврога эга бўлди.