Олимпиада лицензианти Рустам Ассакаловни табриклаймиз!

Рустам Ассакалов 1984 йил 13 июль куни дунёга келган. Халқаро тоифадаги спорт устаси. "Динамо" клуби аъзоси. Мураббийлари - Владимир Холодаев, Камил Фаткуллин, Равшан Рўзиқулов. 

Ассакалов 2015 йил АҚШнинг Лас-Вегас, 2019 йилда Қозоғистоннинг Нур-Султан шаҳрида ўтказилган жаҳон чемпионатларининг мос равишда кумуш ва бронза медаллари соҳиби ҳисобланади. У 2014 йилги Инчеондаги Осиё ўйинларида чемпионлик шохсупасига кўтарилган. 2018 йил Жакартада ўтган Осиё ўйинларида кумуш медаль билан тақдирланган. 

Бугунги кун қаҳрамони 2013 йил Нью-Дели, 2015 йилда Доҳа шаҳри мезбонлик қилган Осиё чемпионатида барча рақибларини мағлубиятга учратиб, олтин медални қўлга киритган. У шунингдек, Осиё чемпионатларининг икки карра кумуш ҳамда бронза медалларига ҳам эга чиққан. 2017 йил Бокудаги Ислом Бирдамлик ўйинларининг бронза медалига сазовор бўлган. 2019 йил Қозоғистонда ўтган жаҳон чемпионатида Токио Олимпиадаси йўлланмасини нақд қилган.

Фурсатдан фойдаланиб, Рустам Ассакаловни Ўзбекистон спорт курашлари ассоциацияси раҳбарияти, мураббийлар штаби, курашчилар ҳамда сайтимиз мухлислари номидан бугунги таваллуд куни билан муборакбод этамиз. Олимпиадада ғалаба ва омад ёр бўлсин!