07 дек 13:25
Янгиликлар
Олмалиқда Жисмоний тарбия ва спорт бошқармаси кубоги учун мусобақа ўтказилди
Ўзбекистон Республикаси Президентининг 2017 йил 3 июндаги “Жисмоний тарбия ва оммавий спортни янада ривожлантириш чора-тадбирлари тўғрисида”ги ПҚ-3031-қарори, Президентимиз томонидан илгари сурилган бешта муҳим ташаббуснинг иккинчи ташаббуси ижросини таъминлаш бўйича ёшларни спортга кенг жалб этишни, Ўзбекистон Республикаси Бош вазирининг 2019 йил 31 майдаги 1-сонли ва 2019 йил 8 октябрдаги 9-сонли йиғилиш баёни ижросини таъминлаш мақсадида ўтказилган мазкур мусобақада вилоят жисмоний тарбия ва спорт бошқармаси, ушбу бошқарма тизимидаги Чирчиқ ихтисослаштирилган олимпия захиралари мактаб-интернати, спортнинг яккакураш турлари бўйича ихтисослаштирилган болалар-ўсмирлар спорт мактаби, барча болалар-ўсмирлар спорт мактабларининг директор ва ўринбосарлари, методистлари ҳамда мураббийларидан иборат йигирмата жамоа иштирок этди.
Қизиқарли ва муросасиз ўтган беллашувлар олимпия қоидаларига мувофиқ ташкил этилди. Айниқса, мусобақанинг ярим финал ва финал ўйинлари шиддатли тус олди. Учинчи ўрин учун Бўка ва Бекобод туманлари ўзаро куч синашишди ва 3:2 ҳисоби билан Бўка тумани болалар-ўсмирлар спорт мактаби жамоаси устунликка эришиб, бронза медалларини қўлга киритишди.
Фахрли биринчи ўрин учун Чирчиқ ИОЗМИ ҳамда Юқоричирчиқ БЎСМ жамоалари ўзаро тўқнаш келишди. Футзалда анчайин маҳоратли бўлган Чирчиқ ИОЗМИ жамосининг қўли баланд келди. Улар рақибларини 4:3 ҳисобида мағлуб этиб, бош соврин - кубокни қўлга киритди ва чемпионликни тантана қилишди.
Шунингдек, мусобақада турли номинациялар бўйича ҳам энг яхшилар аниқланди. Унга кўра “Энг яхши жамоа” деб Зангиота тумани болалар-ўсмирлар спорт мактаби жамоаси топилди. “Энг яхши тўпурар”да бир ўйинда тўққизта гол урган Олмалиқ шаҳар болалар-ўсмирлар спорт мактаби директори Озод Ҳасанов лойиқ кўрилди. “Энг фаол жамоа” номинацияси Тошкент тумани болалар-ўсмирлар спорт мактаби жамоасига насиб этди.
Беллашувлар якунига етгач, тантанали тақдирлаш маросими ташкил этилди. Маросимда иштирок этган Тошкент вилояти жисмоний тарбия ва спорт бошқармаси бошлиғи вазифасини бажарувчи Азамат Туробов ғолиб ва совриндорларни қутлаб, жамоаларга диплом, медаль, кубок ва эсдалик совғаларини топширди.
Илҳом РАҲМОНОВ тайёрлади
Фикрлар