"Олтин ҳуштак" соҳиби: Масофадан ишлаяпмиз

Хусусан, Ўзбекистон спорт курашлари ассоциациясида ҳам раҳбарият, ходимлар, мураббийлар фаолияти масофадан туриб давом эттириляпти. Телеграм ижтимоий тармоғида махсус канал очилган бўлиб, у ерда доимий ахборот, маълумот алмашиш йўлга қўйилган. Мураббийлар спортчиларимизнинг карантин давридаги ҳолати, уларнинг соғлиқлари ҳақида кунлик маълумотларга эга бўлиб боришяпти. Ҳар бир курашчи кунига икки маҳал (эрталаб ва кечқурун)дан тана ҳарорати ҳақидаги маълумотни тақдим этади.

"Кунлик машғулотлардан ташқари, карантин даврида бўш вақт кўп бўлишини инобатга олган ҳолда ассоациция мутасаддилари ўзига хос челленжни йўлга қўйишган. Ушбу челленж "отжимание"дан бошланган эди. Кечадан "сальто" билан давом эттириляпти. Спортчилар, мураббийлар эстафета тарзида бир-бирларига чақирув эълон қилишяпти. Бу жараён ҳам ўз ўрнида бўш вақтни мазмунли ўтказиш учун хизмат қилади. Шунингдек, карантин даврида оила аъзоларимиз учун ҳам ҳар қачонгидан-да кўпроқ вақт ажратяпмиз, фарзандларимиз билан бирга машғулот ўтказяпмиз, набиралар билан дарс тайёрлаяпмиз. Шахсан ўзимга келсак, Олимпиада ва жаҳон чемпионатларидаги беллашувларни қайтадан кўриб, ҳакамлик томонига эътибор қаратяпман. Хориждаги ҳамкасбларимиз билан доимий равишда мулоқот қилиб, фикр алмашиб турибмиз, - дейди Ўзбекистон спорт курашлари ассоциацияси ҳакамлар қўмитаси раиси, халқаро тоифадаги олимпия ҳаками, "Олтин ҳуштак" соҳиби Тоҳир Ғуломов. 

Умид қиламизки, ҳукуматимиз талаб этаётган мажбуриятларга тўлиқ риоя қилсак, коронавирус пандемиясини енгиш осон ҳамда тезроқ амалга ошади.