Осиё чемпионатида муваффақиятли иштирок этган полвонларимиз тантанали кутиб олинди

Қитъа миқёсидаги энг нуфузли мусобақада ўзбекистонлик спортчилар 15 та медаль қўлга киритганликлар ҳақида ҳам хабар қилгандик. Бугун Ислом Каримов номидаги Тошкент халқаро аэропортида мусобақада иштирок этган курашчиларимиз тантанали тарзда кутиб олинди.

Спортчиларимизни қарши олиш учун Миллий олимпия қўмитаси Президенти Умид Аҳмаджонов, Жисмоний тарбия ва спорт вазири Шоакрам Исроилов, МОҚ Бош котиби Жасур Матчанов, Ўзбекистон спорт курашлари ассоциацияси мутасаддилари, чемпион спортчиларнинг оила аъзолари, мухлислар ва ОАВ ҳодимлари Тошкент халқаро аэропортида жам бўлишди.

Шуни алоҳида қайд этиб ўтишимиз лозимки, эркин кураш бўйича терма жамоамиз баҳсларда 3 та олтин, 2 та кумуш ва 3 та бронза медаллари билан спортнинг ушбу тури ниҳоятда тараққий этган Эрон, Қозоғистон, Хитой, Жанубий Корея ва Япония каби мамлакатларни ортда қолдириб, умумжамоа ҳисобидла фахрли биринчи ўринни эгаллади.
Маълумот учун, эркин курашчиларимиз икки марта - 1999 ва 2011 йилларда ҳам Осиё чемпионатини биринчи ўринда якунлашганди. Аммо фарқли томони шундаки, ўша ҳар иккала мусобақа ҳам Тошкентда бўлиб ўтган ва терма жамоамиз унда мезбон сифатида иштирок этганди. Бу сафар эса терма жамоамиз биринчи марта мамлакатимиздан ташқарида, хорижий давлат худудида умужамоа ҳисобида биринчи бўлди.  

Юнон-рум кураши бўйича терма жамоамиз эса 1 та олтин, 2 та кумуш ва 3 та бронза медаллари билан Осиё чемпионатини умумжамоа ҳисобида кучли учликда якунлади.

Осиё чемпионатида муваффақиятли иштирок этган спортчиларимизни олдинда Осиё ва Олимпия ўйинлари кутиб турибди. Биз уларга олдинда турган муҳим ва нуфузли мусобақалардан ҳам мана шундай хурсандчилик ва ёруғ юз билан Ўзбекистонга қайтишларини тилаб қоламиз.