Ўзбек профессионал боксида йил воқейлиги - WBC Конвенцияси!

12-17 ноябрь кунлари пойтахтимиз тарихда илк бор Бутунжаҳон бокс иттифоқи (WBC)нинг 61-Конвенциясига мезбонлик қилди. WBC профессионал бокснинг энг нуфузли йўналиши бўлиб, унга 1963 йилда асос солинган. Штаб-квартираси Мексиканинг Мехико шаҳрида жойлашган. 2022 йил ташкилотнинг юбилей - 60 йиллик Конвенцияси Мексикада ўтказилган ва айнан ўша тадбирда 61-Конвенция мезбонлиги Тошкент шаҳрига ишониб топширилганди. 

Йилнинг энг муҳим бокс тадбирида қатнашиш учун юртимизга юздан зиёд мамлакатдан делегатлар келди. Ўзбекистонда WBC ташкил этилганлигининг 60 йиллиги ҳам нишонланди. Шу кунгача Конвенция Мексикадан ташқари АҚШ, Европа мамлакатларида ташкил этилганди. МДҲ мамлакатлари орасида Боку (Озарбайжон) ва Москва (Россия) шаҳарлари ҳам ушбу тадбирга мезбонлик қилган. Осиё давлатлари орасида Таиланд, Япония ҳам WBC конвенциясини қабул қилган. Марказий Осиё давлатлари орасида биз биринчи бўлдик. 

WBC 61-конвенциясида таълим, допинг, ҳакамлик, халқаро муносабатлар, бокс қоидалари, рейтинглар, чемпионлик камарлари, хайрия ва жамоат ташаббуслари каби бир нечта масалалар бўйича йиғишлар ўтказилди. Майк Тайсон, Эвандер Холифилд, Александр Усик, Роберт Дюран, Костя Цзю, Амир Хан сингари дунёга машҳур бокс юлдузлари ушбу тадбирда иштирок этишди. 17 ноябрь куни муҳташам "Ҳумо Арена"да ўтказилган катта профессионал бокс кечаси билан WBC Конвенциясига якун ясалди.