Ўзбекистон автомобиль спорти Низоми ва Қоидалари кучга кирди

Жорий йил 9 сентябрда бўлиб ўтган учрашувда Туризм ва спорт вазири ўринбосари Авазжон Каримов ҳамда Ўзбекистон Миллий автомобиль клуби жамоатчилик бирлашмаси вице-президенти Алекс Цой Ўзбекистон Республикасида автомобиль спорти Қоидалари ҳамда автомобиль спорти бўйича 2021 йилги республика ва минтақалараро мусобақалар тўғрисидаги Низомни тасдиқлаб, имзолашди.

Ўзбекистон Республикасида автомобиль спорти Низоми ва Қоидалари Ўзбекистон Миллий автомобиль клуби жамоатчилик бирлашмаси томонидан Халқаро спорт кодекси(ИСC)га мувофиқ ҳамда спорт ваколатлари асосида ишлаб чиқилган ва мувофиқлаштирилган.

Халқаро автомобиль федерацияси (FIА)га – 1904 йилда асос солинган бўлиб, у бутун дунёда халқаро автомобиль спортини (картингдан бошлаб Формула-1га қадар) бошқарувчи нуфузли орган ҳисобланади. FIA, шу билан бирга жаҳондаги етакчи автомобиль ташкилотларини ўз атрофига бирлаштириб, нафақат автомобиль спортини ривожлантиришга, балки сайёрамиздаги йўл ҳаракати иштирокчиларини хавфсиз, барқарор ва қулайлик билан таъминлашга хизмат қилади.

FIAга жаҳондаги 143 мамлакатнинг 245 дан ортиқ автомобиль спорти клублари, хусусан «Ўзбекистон миллий автомобиль клуби» жамоатчилик бирлашмаси ҳам аъзо бўлган. Ташкилотнинг бутун дунё бўйича 80 миллиондан ортиқ аъзолари мавжуд.

Халқаро спорт кодексига (ISC) мувофиқ ишлаб чиқилган Ўзбекистон Республикасида автомобиль спорти Низоми ва Қоидалари миллий автоспортнинг ривожланиши, шунингдек, мамлакатнинг халқаро автоспортга уйғунлашувига сезиларли таъсир кўрсатади. Бу эса, ўз навбатида юртимизда автоспорт бўйича халқаро мусобақаларни ўтказиш имконини беради. Шунингдек, сезиларли даражада спортчиларимиз учун картингдан бошлаб Формула-1гача бўлган мусобақаларда қатнашиш имкониятини очиб беради.