Ўзбекистон ўсмирлар Олимпия ўйинларидаги лицензиялар бўйича ўз рекордини янгилади

Мусобақа спортчиларимиз учун омадли кечмоқда. Кеча икки нафар ҳамюртимиз Регина Адашбоева (босқон улоқтириш) ва Роксана Худоярова (учхатлаб сакраш) лар белгиланган меъёрларни бажариб, III ўсмирлар Олимпия ўйинларига йўлланмани қўлга киритгандилар.

Бир неча дақиқа олдин яна бир ҳамюртимиз Буэнос-Айрес йўлланмасига эга бўлди. Босқон улоқтириш баҳсларида юртимиз шарафини ҳимоя қилаётган Умид Ҳасанов 64.89 метр натижа кўрсатиб, Ўзбекистон спорт делегацияси сафига яна бир лицензияни қўшиб қўйди.

Қайд этиш лозимки, ушбу лицензия Ўзбекистон терма жамоаси учун Аргентина Олимпиадасига 29-йўлланма бўлди. Шу тариқа, ўсмирлар Олимпия ўйинларидаги рекордимиз янгиланди.

Бунгача Ўзбекистон спорт делегацияси 2010 йилги Сингапур Олимпиадасида 21 нафар, 2014 йилги Нанкиндаги ўсмирлар Олимпия ўйинларида эса 28 нафар спортчи билан иштирок этган. Демак, 2018 йилги Олимпия ўйинларида бу кўрсаткич янгиланади.

Енгил атлетикачиларимиз ҳали мусобақадаги иштирокларини якунлаганлари йўқ. Демак, яқин вақт ичида лицензияларимиз сони янада ортиши эҳтимолдан ҳоли эмас. Шунингдек, яқин 1 ой ичида ҳамюртларимиз спортнинг сузиш, дзюдо ва теннис каби турларида ҳам Буэнос-Айрес йўлланмасини қўлга киритишлари кутилмоқда.