Ўзбекистонда ММА бўйича янги промоушен ташкил этилди ва янги "7 Saber" брендининг тақдимоти ўтказилди

Шунингдек, бугунги тадбирда U1 Championship ҳамда 7 Fighting Series брендларининг ҳам тақдимоти ўтказилди

Бугун пойтахтимиздаги муҳташам Hyatt Regency Tashkent меҳмонхонасининг анжуманлар залида мамлакатимизга кириб келаётган янги спорт брендларининг тақдимот маросими ўтказилди.

Тадбирда ташкилотчилар мамлакатимизда ММА, яъни аралаш жанг санъатлари бўйича янги мусобақалар йўлга қўйилаётганлигини расман эълон қилишди.

“Ўзбекистон спортига кириб келиш компаниямиз тарихида муҳим саҳифа бўлишига шубҳам йўқ. Юртингизда олиб борилаётган очиқлик сиёсати натижасида Ўзбекистоннинг халқаро нуфузи тобора ортиб бормоқда, шу жумладан спорт соҳасида ҳам. Умид қиламанки, 7SABER ўзбек спортининг ўзига хос брендига айланиб, у дунёда ҳам ўз мавқеига эга бўлади”, - деди тадбирда 7SABER промоутерлик компанияси муассиси бўлмиш “Berkeley Square Investments” корпорацияси раҳбари Росс Коннон.

Тақдимот маросимида 7SABER билан бир қаторда U1 Championship ҳамда 7 Fighting Series брендларининг ҳам тақдимоти ўтказилди.

Энди икки оғиз 7SABER бренди ҳақида. 7 мусулмон олами учун муқаддас рақамлардан бири. “Saber” сўзи инглизча бўлиб, “қилич” маъносини билдиради. Қилич эса шарт халқларининг ўзига хос рамзларидан бири саналади.

Тадбир давомида ОАВ ходимлари ўзларини қизиқтирган кўплаб саволларга жавоб олишди.

Таъкидлаш жоиз, 7SABER промоушен компаниясининг иш бошлаши натижасида юртимизда қўшимча 3 мингта янги иш ўринлари ҳам ташкил этилади.

Тақдимот маросимида Ўзбекистон Республикаси Туризм ва спорт вазирининг ўринбосари Авазжон Каримов, Миллий олимпия қўмитаси раиси Рустам Шоабдурахмонов ва бошқа спорт мутасаддилари иштирок этишди.