ЎзДЖТСУнинг “Лочин” футбол жамоаси 2020 йилги мавсум чемпиони

Финал баҳсида Тошкент вилояти футбол маҳорати мактабининг “ФК Академия” ва Ўзбекистон давлат жисмоний тарбия ва спорт университетининг “Лочин” футбол жамоалари майдонга тушишди.

Кескин ва муросасиз курашларга бой ўтган финал учрашуви 3:2 ҳисобида университетимиз талабаларидан ташкил топган “Лочин” футбол жамоасининг ғалабаси билан якунланди.

“Лочин” футбол жамоаси Тошкент вилояти биринчилиги II – лига ўйинларининг 2020 йилги мавсуми ғолиблигини ва Ўзбекистон профессионал футбол лигасининг 1 лигасига ўтиш ўйинларида иштирок этиш йўлланмасини қўлга киритди.

Шунингдек, ЎзДЖТСУнинг “Лочин” футбол жамоаси дарвозабони Мухиддин Нурматов Тошкент вилояти биринчилиги II – лига ўйинларининг энг яхши дарвозабони деб топилди.  

Учрашув якунлангандан сўнг Тошкент вилояти биринчилиги II – лига ўйинларининг 2020 йилги мавсуми ғолиб ва совриндорлари ҳамда мавсум давомида ўзини ҳар томонлама намойиш этган иқтидорли футболчилар Тошкент вилояти футбол ассоциацияси томонидан мусобақа рамзий кубоклари, диплом, медаллар, қимматбаҳо эсдалик совғалар билан тақдирландилар.

ЎзДЖТСУ матбуот хизмати