Пакьяо тайбокс бўйича кўпкарра жаҳон чемпиони билан жанг ўтказади

Филиппинлик афсона таиландлик муайтай бўйича бир неча карра жаҳон чемпиони Буакав Банчамекка қарши жанг ўтказади. Ушбу жанг бокс қоидалари асосида ўтказилиб, уч дақиқадан олти раунд давом этади. Шу кунларда жанг санаси ва манзилига расман ойдинлик киритилади. 

Эслатиб ўтамиз, Пакьяо 2021 йилда профессионал боксдаги фаолиятини расман якунлаган эди. Ўшанда у Йорденис Угасга имкониятни бой бериб қўйганди. Унинг ҳисобида жами 62 та жанг бўлиб, 52 ғалаба, 8 мағлубият ва 2 та дуранг бор. Ўтган йилнинг декабрида у кореялик блогер Ди Кей Йога қарши кўргазмали жангда рингга чиқиб, очколар ҳисобига кўра ғалаба қозонганди. 

Банчамек эса ўзининг муайтай, кикбоксинг ва шутбоксингдаги иштироклари билан танилган. Шунингдек, у Гран-при К-1 World МАХ турнирининг икки карра ғолиби бўлган биринчи жангчи ҳисобланади.