"Pantera Sport Club" Қозоғистондаги турнирда умумжамоа ҳисобида 1-ўринни эгаллади

Учинчи бор ташкил этилган ушбу анъанавий халқаро мусобақада Қозоғистон, Ўзбекистон ва Қирғиз Республикасидан 1000 нафарга яқин ёш дзюдочилар медаллар йзлида ўзаро беллашишди. Турнир тўртта ёш тоифаси - 2010-2011, 2012-2013, 2014-2015 ва 2016-2017 йилларда туғилган ўсмирлар ва кичик ёшдаги ўсмирлар ўртасида ташкил этилди.    

Қувонарлиси, “Abilayxan Open Cup” турнирида юртимиз шарафини ҳимоя қилган Бобур Ризаев ва Абдулбосит Абдуваҳобов мураббийлигидаги "Pantera Sport Club" клуби тарбияланувчилари 6 та олтин, 4 та кумуш, 2 та бронза медали билан умумжамоа ҳисобида 1-ўринни эгаллашди. Қозоғистоннинг "Ippon Judo Club" ва спорт мактаб-интернати жамоалари кучли учликда жой олишди. 

Маълумот учун, ушбу клуб тарбияланувчиларининг аксарияти пойтахтимиздаги 102-умумтаълим мактаби ҳудудида Ўзбекистон дзюдо федерацияси ташаббуси билан бунёд этилган сендвич панелли, ихтисослаштирилган дзюдо залида шуғулланишади. Бу эса Федерациянинг клублар тизимини ривожлантириш йўлида олиб бораётган ислоҳотлари ўз мевасини бера бошлаганидан далолат.