Пара сузиш: Берлинда 6 та медалга сазовор бўлдик

Кеча мусобақанинг сўнгги кунида спортчиларимиз бир нечта медалларга сазовор бўлди. Жумладан, аёллар ўртасида 200 метр масофага комплекс усулда сузиш баҳсларида иштирок этган Шоҳсанамхон Тошпўлатова 02:28.31 дақиқа вақт билан олтин медални қўлга киритди. Эътиборлиси, у Токио-2020 ёзги Паралимпия ўйинларида жами 6 та, яъни 50 метр эркин, 400 метр эркин, 100 метр баттерфляй, 100 метр чалқанча, 100 метр брасс ва 200 метр комплекс усулида сузиш баҳсларида кураш олиб боради.

Эркаклар ўртасида 200 метр комплекс усулда сузиш бўйича стартга чиққан Фирдавсбек Мусабеков 02:20.13 дақиқа натижа кўрсатиб, якунда кумуш медалга сазовор бўлди. У Токио-2020 ёзги Паралимпия ўйинларида 100 метр брасс ва 200 метр комплекс усулларида сузиш баҳсларида юртимиз шарафини ҳимоя қилади.

Бугун шунингдек, эркаклар ўртасида 50 метр эркин усулда сузиш бўйича ҳамюртимиз Ислам Аслановга тенг келадиган рақиб топилмади. У олтин медалга сазовор бўлиши учун 00:24.67 сония натижа қайд этди. Асланов Токио-2020 ёзги Паралимпия ўйинларида 50 метр эркин, 100 метр баттерфляй ва 100 метр чалқанча усулда сузиш бўйича баҳсларда иштирок этади.

Бундан ташқари, эркаклар ўртасида 100 метр масофага чалқанча сузиш бўйича ўтказилган баҳсларда яна бир ҳамюртимиз Музаффар Турсунхўжаев 01:06.24 дақиқа вақт билан кумуш медалга сазовор бўлди. Музаффар Токио-2020 ёзги Паралимпия ўйинларида 50 метр эркин, 100 метр чалканча ва 100 метр баттерфляй усулларида баҳсларда қатнашади.

Эслатиб ўтамиз, Жаҳон сериясининг дастлабки кунида 100 метр масофага баттерфляй усулида сузиш бўйича аёллар ўртасида Шоҳсанамхон Тошпўлатова олтин, эркаклар ўртасида эса Музаффар Турсунхўжаев бронза медалига сазовор бўлган эди. Пара сузувчиларимиз Берлиндаги мусобақадан 3 та олтин, 2 та кумуш ва 1 та бронза, жами 6 та медаль билан қайтмоқда.