“Париж сари йўл” селекцион Республика турнирининг навбатдагиси дзюдо бўйича ташкил этилди

Эътиборлиси, бу жараёндан паралимпия спорт турлари ҳам четда қолаётгани йўқ.

Хусусан, жисмоний имконияти чекланган ва ногиронлиги бўлган шахслар ўртасида соғлом турмуш тарзини тарғиб қилиш, уларнинг спорт билан мунтазам шуғулланишлари учун зарур шарт-шароитлар яратиш йўлида кўплаб ишлар амалга оширилмоқда. Айниқса, 2021 йилнинг 18 май куни Ўзбекистон Республикаси Президенти томонидан имзоланган “Паралимпия ҳаракатини ривож-лантиришга доир қўшимча чора-тадбирлар тўғрисида”ги Қарор мамлакатимизда Паралимпия ҳаракатини янги босқичга олиб чиқишга хизмат қилмоқда. 

Ҳурматли Президентимизнинг 2021 йил 5 ноябрда имзолаган “2024 йил Париж шаҳрида (Франция) бўлиб ўтадиган XXXIII ёзги Олимпия ва XVII Паралимпия ўйинларига ўзбекистон спортчиларини комплекс тайёрлаш тўғрисида”ги 5281-сонли қарори ижросини сифатли ташкил этиш мақсадида Ўзбекистон Миллий паралимпия қўмитаси бир қатор чора-тадбирлар режасини ишлаб чиққан. 

Жумладан, мамлакатимизда заиф кўрувчи ва кўзи ожиз инсонлар орасидан спортга қизиқиши ва лаёқати бўлганларни саралаб олиб, яқин келажакда юртимиз шарафини муносиб ҳимоя қиладиган профессионал спортчилар тайёрлаш ҳам устувор вазифа сифатида белгилаб олинган.

17-18 февраль кунлари республикамизнинг барча худудларидан пара дзюдога қизиқиши бўлган 150 нафардан ортиқ заиф кўрувчи ва кўзи ожиз инсонлар Тошкент шаҳрига ташриф буюрди. Саралаш тадбирининг очилиш маросимида Ўзбекистон Миллий паралимпия қўмитаси раҳбарияти, тренерлар ва мутахассислар иштирок этди.

Пойтахтга ташриф буюрган иштирокчилар дастлаб махсус тиббий кўрикдан ўтказилади ва улар орасидан пара дзюдо спорт турига иқтидори бўлганлар саралаб олинади  ва улар ушбу спорт тури билан мунтазам шуғулланишга йўналтирилади.

Ўзбекистон Миллий паралимпия қўмитасининг бу каби саралаш тадбирлари давом этади.