Пекин-2022. Нэтан Чен фигурали учиш бўйича Олимпиада чемпиони!

Фигурали учиш бўйича эркаклар ўртасида эркин дастур якунланиб, ғолиб ва совриндорлар номи маълум бўлди.

Уч карра жаҳон чемпиони, америкалик фигурали учувчи Нэтан Чен энди Олимпиадада тенгсиз бўлди. У қисқа дастурдан кейин ҳам пеқадам бўлиб турган эди. Иккинчи ўринни япониялик Юма Кагияма эгаллаган бўлса, учинчи ўриндан ҳам Япония вакили Шома Уно жой олди. 

Нэтан Чен (AҚШ) яккалик баҳсларида ўйинлар совринини қўлга киритган еттинчи америкалик спортчига айланди. 22 ёшли спортчи учун бу медаль Пекиндаги иккинчиси, Олимпия ўйинларидаги учинчи медаль бўлди. Чен бир неча кун аввал жамоавий баҳсларда кумуш медалга эга чиққан эди. Шунингдек, у Пхёнчхан Олимпиадасида терма жамоаси билан бронза медалини қўлга киритган. 

Япониялик Юма Нагияма Пекин Олимпия ўйинларида иккинчи бор совридорлар қаторидан жой олди. 18 ёшли Нагияма 7 февралда жамоаси билан бронза медалига эга чиққан эди. 

Бугун 3-ўринни эгаллаган Шома Уно ҳам ҳамюрти Нагияма сингари Пекиндаги иккинчи медалини қўлга киритди. Пхёнчхан-2018 Олимпиадасида яккалик баҳсларида шоҳсупанинг иккинчи ўрнини банд этганди. 

Фаворитлар қаторида медалларга эга чиқиши кутилган россияликлардан энг яхши натижани Евгений Семененко қайд этди. У яккалик баҳсларини 8-ўринда якунлади. 

Пекин-2022. Фигурали учиш. Эркаклар яккалик 

1. Нэтан Чен (АҚШ) – 332,60

2. Юма Кагияма (Япония) – 310,05

3. Шома Уно (Япония) – 293,00

4. Юдзуру Ханю (Япония) – 283,21

5. Чха Джун Хван (Жанубий Корея) – 282,38

6. Джейсон Браун (АҚШ) – 281,24

7. Даниэль Грассль (Италия) – 278,07

8. Евгений Семененко (Россия) – 274,13

9. Цзинь Боян (Хитой) – 270,43

10. Морис Квителашвили (Грузия) – 268,62