14 авг 11:40
Янгиликлар

Бокс/ММА

PFL 7: Тожикистонлик Ражабов Гран-при финалига чиқди

АҚШнинг Флорида штати Голливуд шаҳрида ММА бўйича PFL 7 турнири бўлиб ўтди.

Ушбу ММА оқшомида енгил ва ярим ўрта вазн тоифаларида промоушеннинг Гран-при турнири финалчилари аниқланди. Финалга йўл олган жангчилар 2021 йилги мавсум чемпионлиги билан бирга бир миллион доллар мукофот пули учун ҳам октагонга кўтарилади.

Ярим ўрта вазн тоифасидаги финалга россиялик Магомед Магомедкеримов ҳамда америкалик Рэй Купер йўл олди. Улар ярим финалда мос равишда Садибу Сая ва Рори МакДональдни очколар ҳисобига кўра мағлуб этишди.

Енгил вазн ярим финалида тожикистонлик Лойк Ражабов Алекс Мартинезни, бразилиялик Рауш Манфио эса Клей Коллардни таслим эта олди. Чемпионлик ва бир миллион доллар учун кечадиган Магомедкеримов - Купер ва Ражабов - Манфио финал жанглари 27 октябрь куни бўлиб ўтади.