Prague Masters. Абдусатторов ҳамон пешқадам, Якуббоев ҳам

Мазкур шахмат фестивали тоифасига қараб учта гуруҳда ташкил этилмоқда. Кучлилар жам бўлган "Masters" гуруҳида ўзбекистонлик гроссмейстерлар — Нодирбек Абдусатторов ва Нодирбек Якуббоев ҳам бош соврин йўлида муваффақиятли одимламоқда. 

Кеча ўтказилган учинчи турда ҳам гроссмейстерларимиз рақиблари билан дурангга имзо чекишди. Абдусатторов оқ доналарда германиялик Винсент Кеймер билан, Якуббоев эса америкалик Ҳанс Мок Ниеманн билан муросага келган. Ҳар икки рақиб ҳам рейтингда шахматчиларимиздан юқори ўринларни эгаллаб турибди. 

Prague Masters 3-турида амалдаги жаҳон чемпиони ҳиндистонлик Гукеш Доммараджу нидерландиялик Йорден ваг Форестга ютқазиб қўйди. Испаниялик Дэвид Антон чехиялик Дэвид Навара билан дуранг ўйнади. Ҳиндистонлик Аравиндҳ Читамбарам эса эронлик Парҳам Мақсудлуга қарши кечган баҳсда дурангга рози бўлди. 

Учинчи турдан сўнг турнир жадвалида Нодирбек Абдусатторов 2 очко билан қўшимча кўрсаткичларга кўра пешқадамлигини сақлаб қолди. Икки очкога эга Нодирбек Якуббоев эса учинчи ўринни банд этган. Йорден ван Форест кечаги ғалабаси эвазига икки очко билан қўшимча коэфицентларга кўра иккинчи ўринга кўтарилиб олди. 

Тўртинчи турда Нодирбек Абдусатторов қора доналарда испаниялик Давид Антонга, Нодирбек Якуббоев эса оқ доналарда нидерландиялик Йорден ван Форестга қарши ўйнайди.