Premier League. Сайматов 7 ой кутилган медални тақдим этди

Африка қитъасидаги мусобақада Ўзбекистон терма жамоасининг 6 нафар аъзоси ҳам иштирок этди. Сайёрамизнинг 78 давлатидан 700 нафарга яқин каратэ усталари қатнашган мусобақа Токио Олимпиадасига муҳим рейтинг очколари тақдим этиши билан ҳам аҳамиятли эди. 

-60 кг вазн тоифасида юртимиз шарафини ҳимоя қилган энг ишонган спортчимиз Садриддин Сайматов бронза медалини қўлга киритди. Бу медални терма жамоамиз 7 ой кутишига тўғри келди. Сўнгги бор бу каби нуфузли турнирда 2018 йилнинг октябрида медалга эга бўлган эканмиз. 

Аниқроғи, Япониянинг Токио шаҳрида ўтган Premier League сериясига кирувчи нуфузли мусобақада -67 кг вазн тоифасида юртимиз шарафини ҳимоя қилган Иқболжон Узоқов бронза медалини қўлга киритган экан. Иқболжон Франция, Австрия, Қозоғистон вакилларини мағлуб этиб, ярим финалда туркиялик рақибига имкониятни бой бериб қўйганди. Бронза медали учун баҳсларда эса Украина ва Франция каратэчиларидан устун келиб, бронза медали эгасига айланган эди. 

Рабатдаги Премьер лига мусобақасида қатнашган қолган каратэчиларимиз Санжар Абдукаримов, Иқболжон Узоқов (-67 кг), Достонбек Отаболаев (-75 кг), Баҳринисо Бобоева (-50 кг) ва Барно Мирзаева (-61кг) яна қуруқ қўл билан Ватанга қайтишди. Ундан аввалги Шанхай, Париж, Дубай, Зальцбургдаги мусобақаларда битта ҳам медал қўлга киритилмади. Бу кетишда Токио Олимпиадаси ўзбекистонлик каратэчиларсиз ўтадиган кўринади.    

Энг ишонган каратэчимиз Садриддин Сайматов рейтингда анча қуйига шўнғиб кетган. Унинг вазнида қозоғистонлик Ассадилов барчани хайратлантиришда давом этмоқда. У ўтган йили жаҳон чемпионатида бронза медалини қўлга киритганидан кейин кетма-кет ўзи қатнашган барча мусобақалардан медал билан қайтмоқда ва айни пайтда рейтингнинг 4-поғонасига кўтарилиб олган.