Президент Фармонининг мазмун-моҳияти ҳамда ижро интизомини мустаҳкамлашга қаратилган ўқув-амалий семинар ўтказилди

Семинар видеоконференция шаклида ташкил этилиб, унда бир нечта студиядан турли вазирликлар ва идораларнинг ходимлари иштирок этишди.

Йиғилишни ташкил этишдан кўзланган мақсад, Ўзбекистон Республикаси Президентининг 2021 йил 10 февралдаги “Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида”ги ПФ–6166-сонли Фармони мазмун-моҳиятини тушунтириш ҳамда ижро интизомини янада мустаҳкамлашга қаратилди.

Дастлаб, Вазирлар Маҳкамаси аппарати бошқарувчисининг ўринбосари Хаитбай Хаитбаев мазкур Президент Фармонининг мазмун-моҳияти ҳақида қисқача тушунтириш берди ҳамда ўқув-амалий семинарни очиб берди.

Шундан сўнг, Вазирлар Маҳкамасининг тегишли котибият мудирлари ўз йўналишларидаги вазирликлар ва идораларда ижро интизомининг бажарилиши юзасидан маърузалар билан чиқиш қилди.

Видеоконференцияда Жисмоний тарбия ва спорт вазирлиги мажлислар залидан вазирлик, шунингдек Туризмни ривожлантириш давлат қўмитаси, Миллий олимпия қўмитаси ҳамда Миллий антидопинг агентлиги раҳбар ва масъул ходимлари иштирок этишди. 

Йиғилишда Жисмоний тарбия ва спорт вазирлигида ижро интизомининг бориши юзасидан Ахборот-таҳлил бошқармаси бошлиғи Исомиддин Пўлатов ҳам маъруза қилди. Ўқув-амалий семинар якунида Ҳукумат топшириқларининг ижросини ўз вақтида ва сифатли таъминлаш бўйича тезкор чоралар кўриш бўйича вазирлик ва идораларга тегишли топшириқлар берилди.