Президент топшириқлари назоратда

Давлатимиз раҳбари томонидан мамлакатимизда соғлом турмуш тарзи, жисмоний тарбия ва спортни янада тарғиб қилиш, спортчиларимизнинг халқаро майдондаги муваффақиятларини кўпайтириш бўйича бир қатор Қарор ва Фармонлар имзоланмоқда. 

МОҚ раҳбари Рустам Шоабдураҳмонов бошчилигида мазкур меъёрий ҳужжатларда Ўзбекистон МОҚга берилган топшириқлар ижроси юзасидан Қўмита мутасаддилари билан йиғилиш ўтказилди. Суҳбат давомида МОҚ раиси ҳар бир йўналишдаги топшириқлар ижросининг ҳозирги ҳолатини батафсил ўрганиб чиқди.

“Ҳурматли Президентимизнинг берган топшириқ ва кўрсатмаларини сўзсиз амалга оширишимиз лозим. Юртбошимизнинг соғлом турмуш тарзи тарғиботи бўйича бошлаган ташаббусларини биз давом эттирамиз. Бунда барча йўналишдаги вазифалар атрофлича таҳлил қилиниб, белгиланган мутасадди ташкилотлар, масъуллар билан ишлаймиз. Бу меъёрий ҳужжатлар ва топшириқлар Янги Ўзбекистоннинг спорт соҳасидаги салоҳиятини кўтариб беришда муҳим аҳамиятга эга”, – деди Рустам Шоабдураҳмонов.

Йиғилишда Президент Қарорларида оммавий спорт тарғиботи йўлида ўтказилиш белгиланган мусобақаларнинг тақвимини федерациялар мутасаддилари билан батафсил кўриб чиқиш, “Тошкент-2025” ёшлар Осиё ўйинларига олиб борилаётган тайёргарликлар, Халқаро кураш институти фаолиятини янада замонавий методикалар билан таъминлаш каби йўналишларни чуқур ўрганиш бўйича кўрсатмалар берилди.