Қамашида қўл жанги мусобақаси ўтказилди + ФОТО

Қамаши туман жисмоний тарбия ва спорт бўлими ҳамда туман болалар-ўсмирлар спорт мактаби ҳамкорлигида қўл жанги спорт тури бўйича болалар-ўсмирлар спорт мактаби тарбияланувчилари ва туман Темурбеклар мактаби ўқувчилари ўртасида саккиз вазн тоифасида ўтказилган мусобақада 152 нафар (шундан қизлар 30 нафар)дан  зиёд спортчи иштирок этди.

Мусобақаларнинг якуний натижаларига кўра, умумжамоа ҳисобида ёшлар ўртасида 1-ўринга Мирсаид Сайдуллаев мураббийлигидаги БЎСМ қўл жанги спорт тури бўлими жамоаси, иккинчи ўринга Ҳусниддин Собирдинов мураббийлигидаги БЎСМ қўл жанги бўлими жамоаси, учинчи ўринга Қамаши туман Темурбеклар мактаби жамоалари сазовор бўлди.

Туман болалар-ўсмирлар спорт мактаби тарбияланувчилари ва Қамаши туман Темурбеклар мактаби ўқувчилари ўртасида умумжаоа ҳисобида биринчи ўрин БЎСМ-1 жамоаси, иккинчи ўрин туман БЎСМ-2 жамоаси учинчи ўрин туман Темурбеклар мактаби жамоаларига насиб этди.

 Мусобақа давомида ўз ташаббуси билан иштирок этган вилоят Миллий гвардия қўриқлаш бошқармаси ходимлари ҳам ўз ҳиссаси қўшишди.

Юқори савияда бўлиб ўтган мазкур очиқ биринчилик мусобақасида ғолиб ва совриндорлар вилоят Миллий гвардия қўриқлаш бошқармаси ва туман болалар-ўсмирлар спорт мактаби томонидан диплом, тегишли медаль ҳамда қимматбаҳо совғалар билан тақдирланди.

– Спортнинг қўл жанги турини оммалаштириш, соғлом турмуш тарзини тарғиб этиш ҳамда спортчиларни рағбатлантириш мақсадида ўтказилган мусобақа юқори савияда ташкил этилди, – дейди вилоят Миллий гвардия қўриқлаш бошқармаси кадрлар бўлими бошлиғи Нурбекжон Ҳамидов. – Қизиқарли ва кескин курашлар остида ўтган мусобақаларда энг муносиблар ғолиблар қаторидан жой олди.

Фахриддин Чориев, Қамаши туман жисмоний тарбия ва спорт бўлими бош инспектори