Қиличбозимиз жаҳон чемпионатида кумуш медалга эга чиқди

Қувонарлиси, унда иштирок этган саблячимиз Бобуржон Расулов юртимиз учун қиличбозлик спорти тарихида жаҳон чемпионатларидаги илк медални қўлга киритди.

Гуруҳ босқичидан сўнг 1/64 финал босқичидан баҳсларга киришган ҳамюртимиз дастлаб қозоғистонлик Степан Севостянов (15:10), сўнг америкалик Кристофер Уолкер (15:13), испаниялик Рогелио Кабалеро (15:13), гонг конглик Си Со (15:7), мисрлик Адҳам Моатаз (15:10) устидан ғалаба қозониб, финал йўлланмасини қўлга киритди. Ҳал қилувчи беллашувда эса россиялик Кирилл Тюлюковга имкониятни бой берди ва кумуш медаль билан тақдирланди. Таъкидлаш жоиз, бу ёшлар ўртасида жаҳон чемпионатида қўлга киритилган дастлабки тарихий медаль бўлмоқда.

Яна бир аҳамиятли жиҳати, қизларимиздан Зайнаб Дайибекова чорак финалгача етиб борди. Қўшимча кўрсаткичларга кўра ёш умидли вакилимиз еттинчи натижа билан мусобақани якунлади. Қайд этиш жоиз, ҳали ҳеч бир қизимиз жаҳон чемпионатларида бундай босқичга етиб келгани йўқ. Бундай натижа терма жамоамизда фаолият олиб бораётган мутахассис, 3 карра Олимпия ўйинлари чемпиони Владимир Назлимовнинг хизматлари мевасидир. Тажрибали мураббий жамоамиз ўз айтиб ўтганидек, ёш спортчиларимизни жаҳоннинг етакчи қиличбозлари қаторига олиб чиқмоқда. Мусобақа давомида Севинч Исмоилова, Шаҳноза Тоғаймуродова, Венера Исмоилова, Шерзодбек Мамутов, Пазилбек Генжебаев, Жалолиддин Душамбоев каби вакилларимиз ҳам муносиб иштирок этишди.

Бу фақатгина ёш саблячиларимизнинг қайд этган натижаси. Ҳали олдинда сабля бўйича жамоавий беллашувлар, шунингдек, рапира ва шпагачиларимизнинг чиқишлари кутиб турибди.