Қизлар ўртасидаги Billie Jean King кубоги саралашида Ўзбекистонга кимлар рақиблик қилиши маълум

Аввалроқ, 1-13 май кунлари қўшни Қозоғистон Республикасининг Чимкент шаҳрида теннис бўйича 19 мамлакатнинг 16 ёшгача бўлган йигит ва қизлари мос равишда Девис Кубоги ва Билли Жин Кинг Кубогининг Осиё ва Океания гуруҳи саралаш баҳсларида иштирок этиши ҳақида хабар берган эдик.

Бироз аввал Билли Жин Кинг Кубогининг Осиё ва Океания минтақаси сўнгги босқичида Ўзбекистон қизлар термасига кимлар рақиблик қилиши ойдинлашди. Унга кўра, қизларимиз гуруҳ кўринишида ўтадиган саралаш баҳсларида Австралия, Янги Зеландия ва қирғизистонлик теннис маликаларига қарши кортга чиқади.

Баҳслар 8-13 май оралиғида ўтказилади. Ўзбекистон қизлар терма жамоасининг ушбу баҳсларга қай таркибда йўл олгани, умуман олганда мусобақада иштирок этиши ҳақида Ўзбекистон теннис федерацияси хабар бергани йўқ, шундай экан, маълумотлар учун Қозоғистон теннис федерацияси матбуот хизматига миннатдорчилик билдирамиз.