Қозондаги уччала теннисчимизда ғалаба, бугун ўзбек дербиси!

Мукофот жамғармаси 25 000 АҚШ долларини ташкил қилувчи мусобақанинг асосий тўр баҳсларида уч нафар теннисчимиз - Санжар Файзиев, Ҳумоюн Султонов ҳамда Сергей Фомин ҳам иштирок этяпти. Уларнинг барчаси илк даврада ғалаба нашидасини суришди. 

ATP рейтингида 386-ўринни эгаллаб турган истеъдодли теннисчимиз Ҳумоюн Султонов биринчи даврада саралаш баҳси ғолибларидан бири сербиялик Борис Бутульяга қарши кортга чиқди. Қозон турнирининг учинчи ракеткаси сифатида сараланган Ҳумоюн рақибини 7:6(4), 6:2 ҳисобида енгди.

Санжар Файзиев россиялик Александр Игошиндан 6:0, 6:3 ҳисобида устун келди. Турнирда саккизинчи рақам остида таснифланган Сергей Фомин эса асосий тўрга имтиёзли йўлланма асосида қўйилган россиялик Алибек Качмазовни 6:3, 2:6, 6:4 ҳисобида мағлубиятга учратди. Энди иккинчи даврада Файзиев ва Фомин бир-бирларига қарши кортга чиқишади.