Rafa Nadal Open. Ҳумоюн Cултонов финал остонасида тўхтатилди

Мукофот жамғармаси 74,825 еврони ташкил этувчи ушбу турнирда ҳамюртимиз Ҳумоюн Султонов ҳам муваффақиятли қатнашди. Rafa Nadal Open by Movistar турнири теннис афсонаси Рафаэль Надаль томонидан ташкил этилаётгани билан ҳам аҳамиятли ҳисобланади. 

Султонов ушбу турнирнинг асосий тўрига саралаш баҳсларидаги ғалабаси эвазига етиб келганди. Мамлакатимизнинг биринчи ракеткаси кетма-кет учта ғалабадан сўнг мусобақанинг 1/2 финалига йўл олган эди. Кеча у 1/2 финалда дунёнинг 134-ракеткаси, турнирда бешинчи рақам остида таснифланган хорватиялик Дуйе Айдуковичга 4/6, 3/6 ҳисобида имкониятни бой бериб қўйди. Ҳумоюн 6, Дуйе 7 та эйс зарбасини амалга оширди. Қўшхатолар Султоновда кўп бўлди - 4 га 1. 

Бу теннисчиларнинг ўзаро иккинчи тўқнашуви бўлди. 2022 йилнинг 22 апрель куни Хорватиянинг Сплит шаҳрида ўтказилган турнирнинг 1/4 финалида Ҳумоюн 2/6, 7/5, 6/3 ҳисобида ғалаба қозонганди. Ўшанда Айдукович турнирнинг биринчи, Султонов эса бешинчи ракеткаси эди. Дуйе кеча мувозанатни тиклади - 1:1. 

Таққослаш учун, Ҳумоюн Султонов ATP рейтингида 264-поғонадан жой олган.