Рафаэль Дос Аньос Жастин Гэтжига "вызов" ташлади

36 ёшли тажрибали жангчи кейинги рақиби Ислам Махачев эмас, аксинча рейтингнинг иккинчи поғонасидан жой олиб турган Жастин Гэтжи бўлишини истамоқда. Бу ҳақида UFC рейтингида еттинчи ўринни эгаллаб турган Аньос Твиттер саҳифасида ёзган. У америкалик таниқли менежер Али Абделазизга жавоб берган.

"ТОП-5 рейтингидан жой олганларнинг бари Жастин Гэтжидан қочиб кетди", - деб ёзган Абделазиз.

"Биласанми, энг юқори рейтингилар орасидан ким рақиб бўлишга муносиб? Мен шу ердаман. Менга шартнома жўнат", - дея Алига жавоб ёзган бразилиялик.

Рафаэль Дос Аньос ўтган йилнинг ноябрь ойида Пол Фелдерни мағлубиятга учратган эди. 32 ёшли Жастин Гэтжи эса Хабиб Нурмагомедовга ютқазиб қўйганди. 

Маълумот учун, Хабиб Нурмагомедовдан қолган камар учун жанг 15 май куни Майкл Чендлер ва Чарльз Оливейра ўртасида бўлиб ўтади. Жастин эса UFC президентининг айтиши бўйича, июль ойида ўтказиладиган Конор Макгрегор - Дастин Порье жанги учун захира варианти бўлади. Яъни кимдир жароҳат олса, унинг ўрнини айнан Гэтжи эгаллайди.