Раҳматжон Рўзиохунов ҳозир ўтказилаётган йиғин, хорижий терма жамоалар ва мусобақаларга тайёргарлик ҳақида гапирди

 Ўзбекистон бокс федерацияси матбуот хизмати ушбу йиғин ҳақида терма жамоамиз катта мураббийи Раҳматжон Рўзиохуновнинг фикрлари билан қизиқди. 

Айни пайтда "Янгиобод" ўқув базасида навбатдаги йиғинни ўтказяпмиз. Бу ерда бир неча хорижий мамлакат терма жамоалари билан бирга шуғулланмоқдамиз. Ушбу йиғин орқали Бирлашган Араб Амирликларининг Дубай шаҳрида ўтказиладиган Осиё чемпионатига ҳозирлик кўрмоқдамиз. 

Йиғинда шунингдек Озарбайжон, Иордания, Эрон ва Жазоир терма жамоалари ҳам иштирок этишмоқда. 

Ҳозирги пайтда йигитларимизнинг ҳолати яхши. Энг асосийси жароҳатлар йўқ. Барчаси режа асосида кечмоқда. Асосий мақсадимиз - Олимпиадада муносиб иштирок этиш. Яқинлашиб келаётган Осиё чемпионатида боксчиларимизни яна бир маротаба синовдан ўтказиб оламиз ва Олимпиадагача барча камчиликларни бартараф этамиз. 

Ҳозир давом этаётган йиғин меҳмонларда илиқ таассурот қолдирмоқда. Эронликлар илк маротаба ўқув-машғулот йиғини олиб бориш учун Ўзбекистонга келишди. Ушбу йиғин уларга манзур келди ва кейинги сафар каттароқ делегация билан мамлакатимизга келишларини айтишди. Иордания эса бунгача юртимизда йиғин олиб боришга улгурган. Аввалги йиғинда улар ўзлари учун фойдали жиҳатларни олишган экан, яна юртимизга келишди ва айни пайтда асосий таркиб боксчилари билан Олимпиадага тайёрланишмоқда. 

Озарбайжон терма жамоаси ҳам икки ёки учинчи маротаба Ўзбекистонда ўқув-машғулот йиғинини олиб бормоқда. Улар ҳозирда Франциядаги лицензион турнирга қизғин тайёргарлик кўришмоқда. Шу ерда йиғин олиб бориб, тўғри Франциядаги Европа лицензион турнирига йўл олишади", - деди Раҳматжон Рўзиохунов. 

Ўзбекистон бокс федерацияси матбуот хизмати