04 авг 15:22
Янгиликлар

Спорт курашлари, Бокс/ММА

Рамазон Темиров қатнашиши кутилаётган турнирнинг асосий баҳси Забит иштирокида кечади + ПОСТЕР

Забит Магомедшариповга Истанбулдаги турнирнинг асосий беллашувида UFC ярим енгил тоифаси вакили Юссеф Залал рақиблик қилади.

Бразилия жиу-житсуси қоидалари асосида ташкил этиладиган ACBJJ 22 турнири 30 август куни Туркиянинг Истанбул шаҳрида бўлиб ўтади. Оқшомнинг асосий беллашуви россиялик Забит Магомедшарипов ҳамда марокашлик Юссеф Залал иштирокидаги кечади. Бу Забит учун ACBJJ 30 лигасидаги дебют баҳс бўлади.

Маълумот учун, 35 ёшли Забит Магомедшарипов аралаш яккакурашлардаги (ММА) профессионал фаолиятини якунлаганини эълон қилганидан уч йил ўтиб, февраль ойида ACBJJ лигаси билан шартнома имзолаган эди. Унинг ташкилотдаги дебюти 5 июль куни Москвада бўлиб ўтган ACBJJ 21 турнирида бўлиши керак эди. Бироқ, мусобақага уч кун қолганида россиялик спортчи жароҳат олиб, Рауль Росас билан бўладиган жангдан ечилганди. Унинг ўрнига акаси Хасан Магомедшарипов гиламга чиққан ва америкаликка бўғиш усули билан муддатидан олдин мағлуб бўлган эди.

29 ёшли Юссеф Залал эса жорий йилнинг апрель ойида UFC`даги бешта ғалабали сериясини тўхтатди: у беш раундлик жанг якунида ҳакамларнинг якдил қарори билан Алжамейн Стерлингга имкониятни бой берганди. Айни дамда Залал ташкилотнинг ярим енгил вазн тоифаси рейтингида саккизинчи ўринни эгаллаб турибди.