Расман. Фазлиддин Ғоибназаровнинг 26 июнь кунги жанги тасдиқланди

Одатда биринчи яримўрта вазн (63,5 кг) тоифасида фаолиятини олиб борган Фазлидин (9-1, 5 КО) 26 июнь куни АҚШнинг Невада штати Лас-Вегас шаҳрида ташкил этиладиган бокс оқшомида рингга кўтарилади. 

Чарм қўлқоп устамизнинг бизга хабар беришича, Ғоибназаров шу куни яримўрта вазн (66,7 кг) тоифасида жанг ўтказади ва унинг рақиби мағлубият нималигини билмай келаётган америкалик Куинтон Рэнделл (8-0, 2 КО) бўлади. 

Аввал хабар берганимиздек, Фазлиддин Ғоибназаров украиналик собиқ жаҳон чемпиони Василий Ломаченко ҳамда япониялик Масайоши Накатани бокс оқшомининг андеркардида рингга чиқади. Айни пайтда боксчимиз Тошкентда мураббийи Аброр Турсунпўлатов қўл остида сўнгги машғулотини ўтказяпти. 

Маълумот учунм, Фазлиддин Ғоибназаров шу кунгача проф боксда 10 та жанг ўтказиб, уларнинг 9 тасида ғалаба қозонган (5 та нокаут), 1 маротаба мағлубиятга учраган. Охирги жангини 5 декабрь куни арманистонлик Манук Диланянга қарши ўтказиб, рақибини 8 раундлик жангда очколар эвазига мағлуб этганди.

Унинг рақиби эса профессионал боксда саккизта жангда иштирок этиб, барчасида ғалаба қозонган. Ҳисобида иккита нокаутли ғалаба бор.