24 июл 08:41
Янгиликлар

Бокс/ММА

Расман. Гап-сўз ҳақиқатга айланди. Майк Тайсон - Рой Жонс жанги санаси ва манзили маълум!

Бокс афсонаси 54 ёшли Майк Тайсон ҳамда бешта вазн тоифасида собиқ жаҳон чемпиони 51 яшар Рой Жонс ўртасида жанг ўтказилиши ҳақида хабар берган эдик.

Ниҳоят, ушбу супержанг санаси ва манзили расман тасдиқланди ҳамда ташкилотчилар томонидан эълон қилинди. Кўргазмали мақомдаги жанг 12 сентябрь куни АҚШнинг Калифорния штатида бўлиб ўтади. Икки афсона ўртасидаги жанг 8 раунддан иборат бўлади.

Эслатиб ўтамиз, Майк Тайсон профессионал боксдаги сўнгги жангини 2005 йилда ўтказган ва ўшанда Кевин Макбрайдга имкониятни бой берган эди. Тайсон ҳисобида жами 58 та жанг бўлиб, у уларнинг 50 тасида ғалаба қозонган.

Рой Жонс эса профессионал боксдаги сўнгги жангини 2018 йилнинг февраль ойида Скотт Сигмонга қарши ўтказиб, очколар ҳисобига кўра зафар қучганди. У проф рингда ўтказган жами 77 та жангининг 66 тасида ғалаба қозонган.