Расман: Карлуш Кейруш Гана терма жамоаси бош мураббийи этиб тайинланди

Ушбу масъулиятли вазифа тажрибали португалиялик мутахассис Карлуш Кейрушга топширилди.

Кейруш Гана терма жамоасини бўлажак мундиалда бошлаб боради. Мутахассис ўз фаолияти давомида Португалия, Қатар, Эрон, Миср, Колумбия, Жанубий Африка Республикаси ва БАА каби миллий терма жамоаларни бошқарган. Клублар миқёсида эса Мадриднинг "Реал", Лиссабоннинг "Спортинг" жамоаларидаги фаолияти ҳамда "Манчестер Юнайтед" мураббийлар штабидаги иштироки билан машҳур.

ЖЧ-2026 гуруҳ босқичида Гана миллий терма жамоаси Англия, Хорватия ва Панама вакилларига қарши баҳс олиб боради. Эслатиб ўтамиз, навбатдаги Жаҳон чемпионати 11 июндан 19 июлга қадар АҚШ, Канада ва Мексика стадионларида бўлиб ўтади.

Тажрибали Кейруш "қора юлдузлар" билан гуруҳдан чиқиш вазифасини уддалай оладими? Буни тез орада мундиал баҳсларида кўриб оламиз.