Расман! Тони Фергюсоннинг навбатдаги жанг тасдиқланди + ПОСТЕР

Кетма-кет 7 та жангда мағлубиятга учраган Эл-Кукуй ёқимсиз серияни бузишга уриниб кўради. Америкалик тажрибали аралаш яккакураш устаси 3 август куни БАА пойтахти Абу-Даби шаҳрида ташкил этиладиган UFC Fight Night турнирида Майкл Кьезага қарши октагонга чиқади. Бу жангни UFC раҳбари Дана Уайтнинг ўзи расман тасдиқлади.

Эслатиб ўтамиз, Тони ўтган йилнинг декабрь ойида ўтган UFC 296 турнирида англиялик Пэдди Пимблеттга очколар ҳисобига кўра имкониятни бой бериб қўйганди. Бу Фергюсон учун кетма-кет қабул қилиб олинган еттинчи мағлубият бўлган эди.  

Тони Фергюсон ММАдаги фаолияти давомида 26 ғалаба ва 10 мағлубият қайд этган. Унинг бўлажак рақиби Майкл Кьеза эса охирги жангини ўтган йилнинг июль ойида UFC 291 турнири доирасида Кевин Холландга қарши ўтказганди. Ўшанда Кевин биринчи раунднинг ўзидаёқ Кьезани бўғиш усули билан таслим этган эди.