Рэпер Дрейк Тайсон Фьюрининг ғалабасига катта пул тикди

Оқшомнинг марказий жанги суперозир вазн тоифасида мутлақ жаҳон чемпионлиги учун британиялик Тайсон Фьюри ҳамда украиналик Александр Усик ўртасида ўтказилади. Катта жангларга пул тикиши билан танилган рэпер Дрейк бу сафар ҳам ўз одатига содиқ қолди. 

Дрейк Тайсон Фьюрининг ғалабасига 565 000 АҚШ доллари миқдорида пул тикди. Агар тахмини ўхшаса, миллион доллардан кўпроқ пул ишлаб олади. Лекин шу пайтгача Дрейкнинг тахминлари деярли ўзини оқламаган ва у катта миқдорда пул ютқазган. 

Масалан, Дрейк айнан Ар-Риёд шаҳрида ўтган жангда Фрэнсис Нганнунинг ғалаба қозониши учун 615 000 доллар "ставка" қилган ва якунда чув тушганди. Жошуа собиқ UFC чемпионини чуқур нокаутга учратганди. Ўшанда Фрэнсиснинг ғалабасига 3.10 коэфицент берилганди.  

Ўтган йилнинг сентябрь ойида Дрейк Исраэль Адесаньяга рақиби Шон Стриклендни нокаут қилиши учун 500 000 доллар, декабрь ойида эса Леон Эдвардснинг Колби Ковингтонни муддатидан аввал мағлуб этишига 250 000 доллар тиккан эди. Шу йилнинг январида у яна 700 000 доллар ютқазди. Рэпер Стрикленднинг Дрикус Дю Плессини мағлуб этишига пул "ставка" қилганди.

Бу ҳаммаси эмас, Дрейк Конор Макгрегор, Жозе Альдо, Камару Усман, Жастин Гэтжи, Хорхе Масвидал, Энтони Жошуа иштирокидаги жангларга ҳам пул тикиб, катта миқдорда ютқазиб қўйган эди.