"Ролан Гаррос". Полина Кудерметова cаралашнинг финалига чиқди

Саралаш турнирида 16-рақам остида таснифланган Кудерметова илк даврада нидерландиялик Анук Коэвермансни 6/1, 7/5(5) ҳисобида мағлубиятга учратганди. Кеча тунда ўтган 1/2 финал учрашувида эса болгариялик Виктория Томова қийинчилик билан таслим этилди - 7/6(2), 6/7(5), 6/3. 

Икки соату 14 дақиқа давом этган баҳсда 7 та эйс зарбасини амалга ошириб, 11 та қўшхатога йўл қўйди. Томовада эйс зарбалар бўлмади, қўшхатолари эса 6 тани ташкил қилди. Бу теннисчиларнинг ўзаро ўтказган иккинчи учрашуви бўлди. Ўтган йили октябрда Хитой турниридаги илк баҳсда ҳам Полина Викториядан устун келганди. 

Таққослаш учун, Полина WTA рейтингида 125, Томова 161-ўринни эгаллаб турибди. Эртага Кудерметова саралашнинг финал учрашувида дунёнинг 148-ракеткаси бўлиб турган хитойлик Ван Сиюйга қарши кортга чиқади. Ушбу учрашув 22 май куни бизнинг вақт билан соат 14:00га белгиланган. Саралаш турнирида 30-рақам остида таснифланган Ван 1/2 финалда австралиялик Стром Хантерни 6/2, 7/5 ҳисобида енгди.