Руслан Чагаев Ўзбекистон терма жамоасининг ЖЧ-2026`даги дебютига муносабат билдирди

"Футбол бўйича Ўзбекистон терма жамоаси ҳам ўзбекистонлик боксчилар каби жуда истиқболли йигитлардир. Ҳозир Ўзбекистонда спортнинг ривожланиб бораётгани кишини қувонтиради. Ҳа, Ўзбекистон биринчи ўйинда мағлуб бўлди, лекин уларнинг гуруҳдан чиқишига ишончим комил ва ўйлайманки, улар жаҳон чемпионатида узоқроқ ушланиб қолишади.

Боксчилар эса умуман алоҳида мавзу. Баҳодир Жалолов, Муроджон Аҳмадалиев, Шаҳрам Ғиёсов ва бошқалар каби дунёга танилган профессионалларга эргашиб келаётган Хуршидбек Расулжонов, Лазизбек Фаттоев, Азизбек Тожиев каби ёш йигитлар бор. Бу ўзбек боксининг кейинги авлоди. Барча жангларни кузатиш учун вақт унчалик кўп эмас, лекин ўзбекларнинг жангларини ҳар доим ўтказиб юбормасликка ҳаракат қиламан", - деди Чагаев .

Эслатиб ўтамиз, Чагаев 2016 йилда фаолиятини якунлаган эди. Унинг ҳисобида WBA йўналиши бўйича жаҳон чемпионлик камари, Николай Валуев ва Жон Руиз устидан қозонилган тарихий ғалабалари бор. Шунингдек, у Александр Поветкин ва Владимир Кличко билан рингни бўлишиб, иккаласига ҳам ютқазганди.